Gebreekte vlerke vlieg hóóg

Natalie Hayes is al deur baie in haar lewe en daarom het sy besluit om haar verhaal in boekformaat te vertel om ander te inspireer. Drie gelukkige lesers kan elkeen ’n elektroniese eksemplaar van haar boek wen!

 

 

Natalie Hayes is ՚n inspirerende donkerkop met ’n groot passie vir Jesus, musiek en haar oulike bruin worshond, Eli. Met die eerste oog opslag sal ’n mens nie kan raai waardeur sy al alles in haar leeftyd is nie, maar haar hele getuienis is beskikbaar in haar nuwe boek, GEBREEKTE VLERKE KAN OOK VLIEG. Gina van Staden het meer gaan uitvind oor die skrywer, asook hoe die boek gebore is.

 

VERTEL ONS EERS WIE IS NATALIE BY DIE HUIS?

“Ek glo daaraan dat my ja, ja moet wees en my nee, nee. Ek sê byvoorbeeld nie vir jou dat ek vir jou sal bid, tensy ek nie onmiddellik los waarmee ek besig is en óf dadelik bid, óf ’n tyd met jou vasmaak om jou te bel en oor die foon vir jou te bid nie.

 

Die woord dankie is deel van my. Dit is net ’n klein woordjie, maar is van onmeetbare waarde wanneer dit opreg bedoel word.

 

Wanneer ek ’n suurlemoen in my tee (rooibos en camomile) of in my kos uitdruk, ruik ek eers met diep teue aan my hande voordat ek hulle gaan was. En wanneer ek koffie maak (ek drink net kafeïenvrye koffie met melk, sonder suiker) drink ek eers die reuk in vir ’n paar sekondes voordat dit in my mond gaan.

 

So lief as wat ek is vir optof wanneer ek ’n funksie bywoon, is ek net so lief vir geen grimering, sweetpakbroek en kaalvoet loop by die huis. In die winter troos ek natuurlik die kaal voete met my skaapwolpantoffels.

 

My gunsteling-kleur, -reuk en -seisoen is herfs. (Seker oor ek ’n herfsbaba is?) Het jy al Clarens besoek gedurende die herfsseisoen? Dit is die mooiste-mooi.

 

Ek geniet dit om te lees - meesal Christelik gebasseerde verhale van liefde, vergifnis en oorwinning. Ek lees tans Helena Hugo se Dit gebeur met ander.”

 

HOEKOM HET JY HIERDIE BOEK GESKRYF?

“Ek het dit nie beplan nie. Hoewel ek profetiese woord daaroor gekry het (vyf of ses jaar voordat ek dit geskryf het) en daar ’n begeerte in my hart ontstaan het om ’n boek te skryf, het ek glad nie geweet dat die e-pos drafts wat ek op my selfoon neergepen het hierdie einste boek sou word nie.”

 

WAAROOR GAAN DIE BOEK?

“GEBREEKTE VLERKE KAN OOK VLIEG is my lewensverhaal van molestasie as dogtertjie, verkragting as vyftienjarige maagd deur ’n man van drie-en-vyftig, twee aborsies, affairs, ’n mislukte huwelik, onverklaarbare siektetoestande, die beautiful gebeurtenis toe een van die mans met wie ek ’n affair gehad het, my na Jesus lei, asook die jare en my lewensreis daarna.”

 

WIE WIL JY BEREIK DEUR DIE BOEK?

“Eerstens moet lesers vir Jesus leer ken – Sy hart en liefde vir ons. As dit nie gebeur nie, kan ek maar al die eksemplare in die asblik gooi en die PDF permanent uitwis. Indien hulle Hom reeds ken, moet daar iets nuuts in hulle aangewakker word om nóg nader aan Hom te wil lewe.

 

Ek wil hê dat lesers moet vry kom van alles wat hulle terughou. Talle mense wat my boek lees, sê dat hulle besef dat daar nog soveel mense is wat hulle moet vergewe.

 

’n Man het my gekontak en gesê dat hy sy sussie dertig jaar gelede gemolesteer het en dat hy daarvan wou vry kom. Wow! Dít is my God! Dis die tipe dinge wat moet gebeur, want dan bereik nie net ek iets nie, maar die hele Koninkryk van God baat daarby.”

 

BESKRYF DIE SKRYFPROSES? HOE, WAAR EN HOE LANK HET JY DAARAAN GESKRYF?

“Ek het in Parys gebly, in die pastoor van Godlife Church, Joseph van Eeden, se tuinwoonstel. Ek het talle male beroertesimptome gekry en het selfs een oggend op die mat wakker geword. Clair, Joseph se pragtige vrou, het vir my die keuse gegee: óf ek moes hospitaal toe, óf na my ouers toe, óf sy sou vir my ’n bed in hulle kamer maak.

 

Ek was toe na my ouers vir daai naweek. Ek het onuithoudbaar sleg gevoel, met Jesus gepraat en toe besluit dat ek sou skryf totdat ek beter voel.

 

Soos ek geskryf het, het ek Hom bly vra of daar iets was waarmee ek nog moes deal. Soos die gedagtes opgekom het, het ek getik. Sommer in my e-pos drafts op my foon, soos vroeër genoem.

 

Terug in Parys het ek vir drie dae op die mat in my kamer gelê en aanmekaar geskryf - oor die twintig skryfstukke. Daarna het ek vir vyf weke lank net getik en die verskeie stukke op Facebook gelaai. Mense het my gekontak en gevra waar die volgende stukke was, want hulle kon nie wag om verder te lees nie.

So het ek toe aanhou tik. By skrystuk nommer drie-en-vyftig het ek besef dat hierdie my boek was! Ek ontmoet toe vir Stefaans Coetzee, mede-skrywer van Witwolf en Suiker Britz, en hy leer my ’n paar spel- en taalreëls, omdat ek geen skryfopleiding of -agtergrond het nie. Ek sit die skryfstukke toe oor op my rekenaar en die groot werk begin... redigering! Vanaf die eerste skryfstuk tot 31 Januarie 2020, toe my boek bekendgestel is, het ses maande geneem.”

 

WAS DIT MOEILIK OM SÓ EERLIK EN OOP TE WEES? HET JY JOUSELF BEKOMMER OOR MENSE SE OPINIES EN REAKSIES?

“Omdat ek nie geweet het dat die skryfstukke ’n boek sou word nie, was ek rou-eerlik. Dit was slegs ’n saak tussen my en God, dus was dit vir my maklik. Ek moes wel met tye stop, omdat ek emosies en gebeure van voor af ervaar en beleef het.

 

Toe ek besef het dis my boek, het ek geweet dat dit nét so moes bly, want daar was ’n rede voor. Al waaroor ek wel bekommerd was, was die kru-taal wat ek so af en toe gebruik het, omdat dit glad nie is hoe ek nou meer praat nie. Ek lag eintlik nou nog wanneer ek dink aan die voice note wat ek vir Adele Vrey gestuur het: “Adele, ek gebruik die f-woord ՚n paar keer in my boek. Dink jy ek moet dit vervang met ’n ander woord, of moet ek net sterretjies en goeters gebruik dat hulle self aflei? Ek is bang mense dink ek praat so en sit my boek neer. Veral die hoogheilige mense wat nie foute het nie.

 

My verlede is my verlede. Ek kan nie terug gaan en dit verander nie. Jesus het reeds die prys vir my betaal. Ek is vergewe en ek is vry, so waarom moet ek dit wegsteek en skaam wees daaroor as dit ander kan help om vry te kom en Hom te leer ken?”

 

WAT IS DIE ALGEMENE TERUGVOER OOR JOU BOEK?

“Baie mense kontak my en sê dat hulle besef hulle moet vergewe. Talle vroue wat aborsie oorweeg het, kontak om te sê dankie, hulle het van plan verander.

 

Ander sê weer dat hulle besef het dat hulle lou is in hulle wandel met God. En meer as waarvoor ek gehoop het, sien hulle hul eie verlede wanneer hulle my boek lees, en dan kom hulle tot die besef dat hulle al die jare nog hierdie eina-goeters saam dra.

Ek het nog nie negatiewe kritiek gekry nie. Ek glo daar is seker, maar hulle hou dit dalk  net vir hulself.”

 

AS JY NET EEN BROKKIE ALGEMENE RAAD VIR IEMAND KAN GEE, WAT SAL DIT WEES?
“Jy is nooit te ver van die pad af vir Jesus om jou te red nie. Draai na Hom toe, net soos  jy is. Hy is so lief vir jou dat Hy jou net so sal verwelkom, maar nóg liewer vir jou dat Hy jou nie net so sal los nie. Vertrou Hom en glo Sy Woord, want dit is waar.

 

WAT LÊ VOLGENDE VIR JOU VOOR?
“Huise van veiligheid vir vroue en meisies regoor Suid-Afrika, en hopelik nog ’n boek. Ek het ’n passie vir gebroke vroue en meisies. Ek weet waar ek was, anderkant stukkend, en as Jesus my kon vry maak, kan Hy hulle natuurlik ook vry maak. Dit is die grootste voorreg wanneer ek en/of my boek as instrumente gebruik word.

 

En ek hou van lekker eet. Wie doen nie? Ek eet gesonde kos sonder suiker en stysel. Ek en Lindi (sy was een van die vroue wie my boek gekoop het en nou is sy ’n kosbare gebedsvriendin en my lock down partner hier in Clarens) is tans besig om ’n resepteboek saam te stel met al ons gesonde grendeltyd disse. Hoewel ek baie lief daarvoor is om kos te maak, is Lindi die kok agter die resepteboek.”

 

As jy self iemand is wat uit ’n moeilike verlede kom en nie weet waarheen om te draai nie, sal dit jou baat om GEBREEKTE VLERKE KAN OOK VLIEG aan te skaf en te lees. En as jy reeds ’n pad saam met God stap sal hierdie boek jou opnuut laat besef hoe ver Jesus se genade strek.

 

WEN, WEN, WEN!
Drie gelukkige lesers kan elk ’n elektroniese eksemplaar van GEBREEKTE VLERKE KAN OOK VLIEG wen!

 

Om in te skryf:

*Like en deel hierdie inskrywing op Facebook;

*Gaan LIKE Natalie se boek se blad; en

*Tag drie vriendinne in die kommentaarblokkie.

 

Die wenner sal op 3 Junie 2020 aangekondig word.