Reynardt Hugo gesels oor sy nuwe lewe en enkelsnit

Reynardt Hugo is geen vreemdeling onder Suid-Afrikaners nie. Die talentvolle sanger (en ook gewese lid van die sanggroep ADAM), akteur en motiveringspreker het onlangs sy nuwe solo enkelsnit, Die Rivier, vrygestel. Gina van Staden het gaan uitvind oor die nuwe koers wat sy loopbaan ingeslaan het ,asook wat alles in sy hart broei.

BAIE GELUK MET JOU NUWE ENKELSNIT. WAT BETEKEN DIE LIED VIR JOU OP ’N PERSOONLIKE VLAK? 

“Baie dankie. Die idee vir hierdie liedjie prut nou al ’n hele ruk in my siel. Die verduideliking daarvan is eindeloos. Vir my gaan dit onder andere oor hoe ek my hart vir die Here gegee het ’n paar jaar terug, hoe ek skoongewas is van die slegte dinge en hoe dit gelei het na die vergifnis wat oor my gespoel het. En ook om aan te hou groei en nuwe hoop te bring vir elkeen wat nie op ՚n goeie plek in hulle lewens is nie.”

BESKRYF HOE DIE KREATIEWE PROSES VAN SOLO-KUNSTENAAR VERSKIL VAN ’N GROEP? WAT IS DIE NUWE UITDAGINGS WAT DIT INHOU? 

“Hoe dit verskil van ’n groep is is dat jy alleen volle verantwoordelikheid neem vir die kreatiewe proses van die skryf van ’n liedjie. Jy luister na voorstelle, maar op die einde van die dag is dit jý wat die finale besluit neem. In ’n groep het jy idees (goeie idees), maar dit beteken nie noodwendig dat daardie idees voorkeur sal kry nie. Die uitdaging is om aan te hou skryf. Nie dat dit regtig ’n uitdaging is nie, want dit is iets wat ek natuurlik doen, maar dit is belangrik om nie stoom te verloor nie. En ook om jou voete te vind in die klank wat jy wil hê.”

HOE LYK ’N NORMALE DAG IN JOU LEWE?  

 

“Staan op, gee vir my honde koekies, borsel my tande, maak reg, gee my verloofde ’n soen en ry stel toe. Dan word ek gegrimeer en gaan ek deur my dialoog saam met die ander akteurs. Daarna begin ons met die dag se verfilming. Sodra ek klaar is kom ek by die huis, spandeer ek tyd saam met my verloofde (ons drink koffie en speel met die honde), eet ons en dan begin ek weer voorberei vir die volgende dag se tonele. Nou mag mense dalk wonder waar ek tyd kry vir oefen, skryf en sovoorts? Ek doen dit alles tussen my tonele. Of op my af dae ry ek deur na die produsent toe en skryf ek daar.”
 

HOE HET JY GEVOEL IN DIE TYD NET VOORDAT JY JOU HART VIR DIE HERE GEGEE HET?

“Ek was totaal verlore. Ek het te veel gedrink, dagga gerook en rondgeslaap.”  

EN TOE JY ALLES OORGEGEE HET AAN HOM?

“Dit is nogsteeds ’n aanhoudende groeiproses. Ek het mense uit my lewe gesny wat nie goed was vir my nie. Nou het ek ’n hele nuwe lewe - ek is ’n Christen en lewe volgens Christelike beginsels. Ek hou my ore toe vir mense se negatiwiteit en behou my fokus op my eie lewenspad. Ek maak seker dat ek naby aan die Here leef, nuwe dinge leer en probeer elke dag net my beste om so te leef.”

IS DIT MOEILIK OM IN JOU INDUSTRIE OP DIE REGTE PAD TE BLY? HOE DOEN JY DIT EN HET JY DIE NODIGE ONDERSTEUNING? 

“Nee, dis nie moeilik om op die regte pad te bly nie. As jy nie vir iets gaan staan nie gaan jy altyd verlore wees. Ek staan vir die Here en as iemand nie daarvan hou nie, kan hulle maar padgee. Ek omring myself met die regte tipe mense en het baie goeie vriende wat my ondersteun en uitdaag om aan te hou groei. Ek maak seker dat ek reguit is met mense en dat hulle weet waar hulle met my staan. ’n Belangrike lewensles wat ek geleer het is dat nie almal van jou gaan hou nie - en dis great! Dit gee my net méér motivering om aan te hou.”

IS DAAR ENIGE IETS SPESIFIEKS WAT JY IN GOD SE KONINKRYK WIL DOEN, WAT JY DALK NOG NIE HET NIE? 

“Ek is tans besig om ’n boek te skryf en hierdie boek gaan genesing bring. Dit gaan mense bereik wat emosioneel swaarkry, wat nie weet watter kant toe meer nie. Ek wil inspirerend en postief wees - ek wil  ’n voorbeeld wees vir mense. Ek wil meer oor die Here leer sodat ek my ervarings en ondervindings kan deel met jong mense. Ek wil die boetie wees vir elke seun en dogter wat nie  ’n boetie gehad het nie en ek wil die vriend wees vir elke tienerseun en tienerdogter wat nie ’n vriend het nie. Laastens wil ek die seun wees vir elke man en vrou wat nooit dáárdie seun gehad het nie.”

WAT IS DIE GROOT DROOM WAT JY VIR JOU LEWE HET? 

“Om aan te hou groei. Want hoe meer ’n mens van binne verander, hoe meer verander jou omstandighede van buite. Ek hoop vir nog baie rolle, vertonings en praaitjies, asook om ’n GREAT huwelik te hê en die vermoë om ’n goeie pa te wees.” 

WATTER RAAD HET JY VIR IEMAND WAT DIE REGTE PAD WIL BEGIN STAP? 

“Maak wyse besluite. Moenie voorhuwelikse seks hê, te veel drink of begin rook nie. Moenie dagga rook en dwelms gebruik nie. MOENIE. Dit is nie die moeite werd nie. Jy weerhou jouself daarvan om die beste jy te kan wees.”

Reynardt se passie vir mense lê hom na-aan hart. Hy sê dat enige iemand wat nie weet met wie om te praat nie, of net ondersteuning nodig het, met hom kan kontak maak deur ’n inboks-boodskap op een van sy volgende sosiale media platforms:

Facebook: https://www.facebook.com/ReynardtHugo/

Instagram: @reynardthugo

Dié veelsydige ster se debuut-enkelsnit, DIE RIVIER, is onlangs vrygestel en het soos ’n veldbrand op sosialemedia versprei. Nóú is die musiekvideo van hierdie liedjie, wat reeds die trefferleer op verskeie radiostasies begin klim het, ook beskikbaar!

Son Of Wolf Films was die kreatiewe brein agter hierdie besonderse projek wat in ’n teater in Centurion en ’n straat in Parkhurst afspeel. In die video sing Reynardt sy hart uit, terwyl hy op die verhoog is en in die straat loop. Dit dra nie net by tot die opwindende gevoel van die lied nie, maar sal die kyker ook vry en sorgeloos laat voel. “Terwyl ons in die straat verfilm het, het baie mense uit hulle huise geloer om te sien waarmee ons besig was. Dit was seker ’n vreemde gesig, maar ek het elke oomblik geniet,” deel hy ’n staaltjie oor wat agter-die-skerms gebeur het.

Kyk die video hier!