5 minute met Victor Bravo

Die manne van Victor Bravo verklap meer oor die boodskap agter hulle splinternuwe

enkelsnit, SUIDERKRUIS.

Victor Bravo is ’n akoestiese duo wat bestaan uit voorsanger en ritmekitaarspeler, Weco van Basten en hoofkitaarspeler en agtergrondsanger, Jopie Pienaar.

 

Hierdie groep is in 2018 gestig en sedertdien het hulle al by verskeie groot venues, funksies en feeste (soos Aardklop) opgetree, asook ’n musiekvideo en twee suksesvolle enkelsnitte, naamlik Breakway Line en Skemer, uitgereik.

 

Laasgenoemde is in 2019 vrygestel en het vir negentien agtereenvolgende weke die nommer een posisie op Springbok Internetradio se Top 20 bekleë. Dit is ook aangewys as dié platform se Liedjie van die Jaar. Breakway Line, die duo se debuut-enkelsnit, is in November 2018 uitgereik en die reaksie was oorweldigend goed. Nie net het dit speeltyd gekry op ses groot radiostasies regoor die land nie, maar was dit ook vir nege weke nommer een op die Springbok Top 20.

 

Nou is dié ouens terug in die kollig met hulle splinternuwe liedjie, Suiderkruis, wat tans op die speellyste en treffersparades van verskeie radiostasies pronk.

 

Ons het meer gaan uitvind oor die liedjie en die manne agter die musiek.

 

WAAROOR GAAN SUIDERKRUIS?
Weco: “SUIDERKRUIS is ’n kontemporêre popsnit. Dit is deur my geskryf en Jopie het die akoestiese en elektriese kitaarwerk gedoen. Die liedjie is vervaardig deur Renier Henning Music en sluit die werk van bekende dromspeler, Bruce Wallace, en baskitaarspeler, Janes Blomerus, in. Basies gaan dit oor Suid-Afrika en hoe baie jy daarna verlang wanneer jy nie hier is nie... al probeer jy jouself soms anders oortuig. Ek het dit eerstehands ervaar toe ek vir drie jaar in Amerika ‘groener weivelde’ gaan soek het. Jy bly ’n Suid-Afrikaner in murg-en-been. Rugby, braaivleis, en ons taal vloei deur jou are en ’n deel van jou gaan altyd daarna verlang.”

 

HOEKOM DINK JULLE GENIET AANHANGERS DIE MUSIEK WAT JULLE MAAK?
Jopie: “Goeie musiek moet jou hart raak en dit is wat ons anders maak. Die liedjies wat ons kies, is dieper en ons pas die klank aan om ’n meer treffende en emosionele boodskap deur te gee.”

 

HOE HET VICTOR BRAVO ONTSTAAN EN HOEKOM DIE NAAM?
Weco: “Die projek, Victor Bravo, is so vier jaar terug gebore as ’n konsep in my kop. Die idee was om ’n platform te skep uitsluitlik vir musiek, sonder die ander sideshows. Dinge het vinniger vlam gevat as wat ons gedink het dit sou en vandag is dit vir ons ’n groot voorreg om ook ons eie musiek met die publiek te deel.

 

Ek is Jopie se oom en ons familievan is van Basten... ek het die V en B gebruik en so met die naam opgekom.”

 

WAT IS JULLE PLANNE VIR DIE TOEKOMS?
Jopie: “Definitief om ’n vollengte album agter ons naam te hê en op groter stages op te tree – saam met groot name – sodat ons raakgesien kan word deur diegene wat ons waardevol vind.”

 

WAT WIL JULLE GRAAG MET JULLE MUSIEK BEREIK?
Weco: “Dit moet jet fuel wees vir die ouens wat wil kuier en dit geniet, maar dit moet ook ’n sagte vertroosting wees vir enigiemand wat op daardie oomblik ’n skouer soek om op te huil.”

Wat begin het as ’n Nuwejaarsvoorneme om musiek te maak ter wille van die passie en naletenskap daarvan, het uitgedraai in ’n kitssuksesverhaal wat die groeplede se wildste drome oortref het.

 

SUIDERKRUIS gaan nie net ’n treffer op die dansbaan en om die braaivleisvuur wees nie, maar is ook die volgende stap in die baie belowende musiekloopbaan van hierdie veelsydige groep.

 

Laai dit hier af:
Apple Music
Deezer
Google Play

 

Volg hulle op sosialemedia:
Facebook: https://www.facebook.com/VictorBravoMusic
Twitter: @VictorBravoMusic
Instagram: @VictorBravoMusic