Vyf minute met Wit Kasteel

Wit Kasteel maak al sedert 2015 opslae in die bedryf. Ons gesels met hulle oor hulle nuutste enkelsnit, TOEGEWYD.

Die rockgroep, Wit Kasteel (wat bestaan uit Clemond Dartnell, Ernst Nieuwoudt, Reinard Kruger en Waldemar Behr) se eerste enkelsnit, ’n unieke verwerking van Laurika Rauch se Die Nostalgie, het groot opslae gemaak in musiekkringe toe dit in 2015 vrygetsel is. Dit was vir verskeie weke nommer een op Groot FM en Suidkaap FM se treffersparades en die musiekvideo van dié treffer is reeds deur duisende mense op YouTube gekyk.

 

Die groep het ’n Ghoema-benoeming vir Beste Rock-album (Wit Kasteel) in 2015 gekry en dit het ’n suksesvolle fondasie gelê vir hulle nuutste enkelsnit, TOEGEWYD, wat nou vrygestel word en album wat later vanjaar sal volg.

 

Ons het meer gaan uitvind oor dié kommersiële rocksnit en wat hulle vir die toekoms beplan.

 

WAAROOR GAAN JULLE NUWE ENKELSNIT?
“Die liedjie is geskryf oor die moeilike tye in die lewe. Dit is ’n boodskap vir almal om deur daai tye toegewyd te bly en hulleself op te tel van die grond af en aan te hou deurdruk. Dit is ’n boodskap dat jou verlede nie jou toekoms bepaal nie, maar eerder jou positiewe gesindheid. Die moeilike tye bou karakter, so moet dit nie vergeet nie. Leer daaruit en gebruik dit tot jou voordeel.”

 

WIE HET DIT GESKRYF?
“Wit Kasteel het saam met Hugo Ludik van Muse Studios gewerk aan die enkelsnit.”

 

WAT IS DIE STORIE AGTER DIE LIEDJIE?
“In die huidige ‘klimaat’ waarin ons onsself bevind, dink ons dit is ’n belangrike boodskap.
Ons het al baie gevoel dat die toekoms onseker is, persoonlik en in ons loopbaan. In die verlede was daar gevalle van valse hoop en menigte struikel blokke. Ons het wel altyd gesoek na die positiewe en besluit om daarop te fokus. Ons het ons kenne op gehou, ten spyte van dit en aangehou hard werk.”

 

WAT WAS SOVER DIE HOOGTEPUNT VAN JULLE LOOPBAAN?
“Daar is verseker ’n hele paar hoogtepunte, maar hier is een wat uitgestaan het: Ons het laasjaar ’n privaatvertoning gedoen in Tzaneen en glad nie geweet wat om te verwag nie. Na ons optrede, wou ons iets gaan drink saam met die mense wat ons kom ondersteun het. Toe ons terugkom by die kroeg, het almal Wit Kasteel T-hemde aangehad.”

 

WATTER EFFEK SOU JULLE GRAAG WOU HÊ HIERDIE MUSIEK OP DIE LUISTERAAR MOET HÊ?
“Elkeen van ons liedjies is geskryf met ’n boodskap in gedagte. Elke luisteraar sal ons musiek op hulle manier kan interpreteer, soos dit op hulle lewe van toepassing is.”

 

WIE SE WERK INSPIREER JULLE?
“ACDC, Hendrix, Queen en The Hives.”

 

SAAM MET WATTER KUNSTENAARS SAL JULLE NOG GRAAG WIL WERK?
“Ons sal nog graag saam met Fokofpolisiekar ’n verhoog wil deel.”

 

VERTEL ONS IETS OOR DIE GROEP WAT NIEMAND WEET NIE?
“Aanvanklik het ons begin as ’n Engelse band. Ons het vinnig besluit om Afrikaans toe te skuif, aangesien dit ons Moedertaal is en ons baie trots is daarop.”

 

HET JULLE ENIGE INTERESSANTE RITUELE VOOR ’N VERTONING EN HOEKOM?
“’n Skoot swart Zambuca en ’n huddle met gebed voor elke show.”

 

Die groep het nog baie planne en drome vir die toekoms, wat meer lewendige vertonings en ’n toer na Nederland insluit. Hulle sal ook nog graag saam met Fokofpolisiekar wil werk en by Afrikaans is Groot wil optree in die toekoms. Vir nou vat hulle die reis stap-vir-stap en geniet hulle elke oomblik daarvan.

 

“Ons voel dat ons ’n baie unieke klank na die mark toe te bring wat nog nie bestaan nie. Klassieke rockmusiek is vir ons die lekkerste om te speel, omdat dit die beste stories vertel en ons wil graag die beste verhale met luisteraars deel,” sluit hulle af.

 

Die aanslag van Wit Kasteel se nuwe enkelsnit is vars en nuut en ’n goeie aanduiding van wat van hulle komende album verwag kan word. Dit is ook die begin van ’n nuwe en opwindende hoofstuk in hulle musiekloopbaan.

Laai die enkelsnit hier af!

Volg hulle op sosiale media:

Facebook: https://www.facebook.com/WitKasteel/
Instagram: @witkasteel
Twitter: @witkasteel
Webblad: www.witkasteel.co.za
YouTube: https://www.youtube.com/user/witkasteel

 

Foto: NDW Photography